Hindusthan Samachar
Banner 2 शनिवार, जुलाई 21, 2018 | समय 13:06 Hrs(IST) Sonali Sonali Sonali Singh Bisht

କର୍ଣ୍ଣାଟକ ପ୍ରସଙ୍ଗକୁ ନେଇ ରାଜଭବନ ସମ୍ମୁଖରେ କଂଗ୍ରେସର ଧାରଣା

By HindusthanSamachar | Publish Date: May 18 2018 3:28PM
କର୍ଣ୍ଣାଟକ ପ୍ରସଙ୍ଗକୁ ନେଇ ରାଜଭବନ ସମ୍ମୁଖରେ କଂଗ୍ରେସର ଧାରଣା
ଭୁବନେଶ୍ୱର, ୧୮ ମଇ - କର୍ଣ୍ଣାଟକ ରାଜନୀତିରେ ରାଜ୍ୟପାଳଙ୍କ ଭୂମିକାକୁ ବିରୋଧ କରି ଏଆଇସିସିର ନିଷ୍ପତି ଅନୁଯାୟୀ ଓଡିଶା ପ୍ରଦେଶ କଂଗ୍ରେସ କମିଟି ପକ୍ଷରୁ ଓଡିଶା ରାଜଭବନ ସମ୍ମୁଖରେ ଧାରଣା ଦିଆଯାଇଛି । ପିସିସି ସଭାପତି ନିରଂଜନ ପଟ୍ଟନାୟକଙ୍କ ନେତୃତ୍ୱରେ କଂଗ୍ରେସ ନେତୃବର୍ଗ ଧାରଣା ଦେବା ସହ ନାରାବାଜି କରିଥିଲେ । ଏହସହ କଂଗ୍ରେସର ଏକ ୧୫ ଜଣିଆ ପ୍ରତିନିଧି ଦଳ ରାଜ୍ୟପାଳ ସତ୍ୟପାଲ୍ ମଲ୍ଲିକଙ୍କ ଭେଟିବା ସହ ସ୍ମାରକପତ୍ର ପ୍ରଦାନ କରିଛନ୍ତି । ଏହି ପ୍ରତିନିଧି ଦଳରେ ପିସିସି ସଭାପତି ଶ୍ରୀ ପଟ୍ଟନାୟକ , ପୂର୍ବତନ ସଭାପତି ଜୟଦେବ ଜେନା , କାର୍ଯ୍ୟକାରୀ ସଭାପତି ପ୍ରଦୀପ ମାଝୀ , ଚିରଂଜୀବୀ ବିଶ୍ୱାଳ , ଏଆଇସିସି ସମ୍ପାଦକ ଆଦିତ୍ୟ ଶର୍ମା , ଗଣେଶ୍ୱର ବେହେରା ପ୍ରମୁଖ ସାମିଲ ଥିଲେ । ଅନ୍ୟପକ୍ଷରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ୟେଦୁରପ୍ପାଙ୍କ ଶପଥ ଗ୍ରହଣ ସମୀକ୍ଷା ପାଇଁ ସୁପ୍ରିମ୍ କୋର୍ଟର ୩ ଜଣିଆ ଖଣ୍ଡପୀଠ ଆସନ୍ତାକାଲି ଅପରାହ୍ନ ୪ଟାରେ ନିଜର ବହୁମତ ପ୍ରମାଣ କରିବା ପାଇଁ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି । ସେହିପରି କଂଗ୍ରେସ ଓ ଜେଡିଏସ୍ କୁ ମଧ୍ୟ ବହୁମତ ସାବ୍ୟସ୍ତ କରିବାକୁ କୁହାଯାଇଛି । ଏହି ଖଣ୍ଡପୀଠରେ ବିଚାରପତି ଏକେ ସିକ୍ରୀ , ଜଷ୍ଟିସ୍ ଏସ ଏ ବାୱଡି ଓ ଅଶୋକ ଭୂଷଣ ପ୍ରମୁଖ ରହିଛନ୍ତି । ଏହି ରାୟରେ ୟେଦୁରପା କୌଣସି ଗୁରୁତ୍ୱପୂର୍ଣ୍ଣ ନିଷ୍ପତି ନେଇପାରିବେ ନାହିଁ , ଆଂଗ୍ଲୋଇଣ୍ଡିଆନ୍ ସଭ୍ୟ ମନୋନୀତ କରିପାରିବ ନାହିଁ ବୋଲି ସୁପ୍ରିମ୍ କୋର୍ଟ କହିଛନ୍ତି । ସୂଚନାଯୋଗ୍ୟ ଯେ ରାଜ୍ୟପାଳ ବହୁମତ ପ୍ରମାଣ କରିବାକୁ କଂଗ୍ରେସକୁ ୧୫ ଦିନ ସମୟ ଦେଇଥିବାରୁ ଏହା ବିରୋଧରେ ଜେଡିଏସ୍ ଓ କଂଗ୍ରେସ ଏକ ପିଟିସନ୍ ଦାଖଲ କରିଥିଲେ । ସାମ୍ବିଧାନିକ ବିଶେଷଜ୍ଞ ସୂର୍ଯ୍ୟ ମିଶ୍ର କହିଛନ୍ତି ଯେ କର୍ଣ୍ଣାଟକ ବିଧାନସଭାର ସମୁଦାୟ ସଭ୍ୟ ପଦ ମଧ୍ୟରୁ ୫୦ ପ୍ରତିଶତ ପାଇଥିବା ଯେଉଁ ଦଳ ପ୍ରମାଣ କରିପାରିବ ସେ ଶାସନରେ ରହିବ । ବିଜେପି ୧୧୨ ସିଟ୍ ଦର୍ଶାଇ ପାରିଲେ ଶାସକ ଦଳ ହୋଇପାରିବ । ମାତ୍ର ବିଜେପିର ୧୦୪ ବିଧାୟକ ନିର୍ବାଚିତ ହୋଇଛନ୍ତି । ମ୍ୟାଜିକ୍ ନମ୍ବର ଛୁଇଁବା ପାଇଁ ବିଜେପିକୁ ଆଉ ୮ ବିଧାୟକଙ୍କ ସମର୍ଥନ ଆବଶ୍ୟକ । ଆସନ୍ତାକାଲି ବିଜେପି ସମର୍ଥନ ପ୍ରମାଣ କରିନପାରିଲେ ଜେଡିଏସ୍ ଓ କଂଗ୍ରେସକୁ ପ୍ରମାଣ କରିବାକୁ କୁହାଯିବ ଏବଂ ସରକାର ଗଠନ ପାଇଁ ନିମନ୍ତ୍ରଣ କରାଯିବ । ଏପରି ନହୋଇପାରିଲେ କର୍ଣ୍ଣାଟକରେ ସାମ୍ବିଧାନିକ ଅଚଳାବସ୍ଥା ସୃଷ୍ଟି ହେବ । ଏପରି କ୍ଷେତ୍ରରେ ରାଜ୍ୟପାଳ ୟେଦୁରପ୍ପାଙ୍କୁ କାମଚଳା ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଦେଇ ପାରନ୍ତି , ପୁନର୍ବାର ନିର୍ବାଚନ କରିପାରନ୍ତି କିମ୍ବା ରାଷ୍ଟ୍ରପତି ଶାସନ ଜାରୀ କରିପାରନ୍ତି ବୋଲି ଶ୍ରୀ ମିଶ୍ର କହିଛନ୍ତିି । ..........
image